Gazal , Khaka Nigari , Qata , Qaseeda

خا کہ انگریزی لفظ اسکیچ کا ترجمہ ہے۔ اُردو میں خاکہ کے لیے ” مرقع اور قلمی تصویر کی اصطلاحیں بھی استعمال کی گئی ہیں۔ آج کل ”خاکہ ہی اصطلاح رائج ہے۔ خاکہ سے مراد ایک ایسی نثری تحریر ہوتی ہے جس میں کسی شخصیت کی منفرد اور نمایاں خصوصیات کو اس انداز سے بیان کیا جاتا ہے کہ اس کی مکمل تصویر آنکھوں کے سامنے آجائے اس میں جس شخص کی تصویر کشی کی جاتی ہے اس کے خیالات و افکار سیرت و کردار، عادات و اطوار سب کی جھلکیاں نظر آتی ہیں۔ خاکے کا مقصد ہی یہ ہوتا ہے کہ جس شخصیت کے بارے میں مطلع کیا جارہا ہو اُس شخص کی ظاہری و باطنی خصوصیات میں سے ایسے نمایاں اوصاف کا بیان کیا جائے جو اس منفرد شناخت اور پہچان کے ذریعہ کی انفرادی خصوصیات کا بھر پور تاثر چھوڑ نا خاکہ نگار کا مقصد ہوتا ہے۔ یہ اثر جتنا بھر پور اور مکمل ہوگا خا کہ اتنا ہی کامیاب ہوگا۔ اس کے لیے خاکہ لکھنے والے کا اس انسان کی شخصیت سے نہ صرف متاثر ہونا ضروری ہے بلکہ اس سے مکمل واقفیت اور قربت بھی ضروری ہے۔ پہلی ملاقات یا چند ملاقاتوں کے تاثرات کی بنیاد پر کسی کا خاکہ لکھ دینے سے خاکہ نگاری کا حق ادا نہیں ہوتا۔ خاکہ نگاری سوانح حیات سے مختلف ہے۔ اس میں سوانح حیات کی طرح واقعات ترتیب وار نہیں لکھے جاتے۔ حالات و واقعات کا بیان کرنا ضروری بھی نہیں ہے خاکہ نگاری میں حالات و واقعات شخصیت کی تصویر کشی کے لیے پس منظر فراہم کرتے ہیں۔صرف ان ہی اہم واقعات کا بیان ضمنی طور پر کیا جاتا ہے جو شخصیت کے کسی پہلو کو اجاگر کرتے ہیں۔ خاکہ نگار کسی شخصیت سے متاثر ہو کر اس کا خاکہ ضرور لکھتا ہے لیکن اس کی تحریر سے مرعوبیت کا اظہار نہیں ہونا چاہیے۔ اس کا بیان ایسا ہونا چاہیے کہ وہ غیر جانب دارانہ نظر آئے اس لیے یہ ضروری ہے کہ خاکے میں شخصیت کو خوبیوں اور خامیوں دونوں کو بیان کیا جائے ورنہ شخصیت کی مکمل تصویر سامنے نہ آسکے گی جو خاکہ نگاری کا اصل مقصد ہے۔ جس طرح خوبیوں کا بیان مرعوبیت سے پاک ہونا چاہیے اسی طرح خامیوں کے بیان میں بھی اپنائیت کا احساس نمایاں ہونا چاہیے۔ خاکہ نگار اپنے موضوع کو جس طرح دیکھتا سمجھتا اور اس سے متاثر ہوتا ہے اسی طرح اس کی تصویر پیش کرنی چاہیے تا کہ پڑھنے والے بھی اس سے اسی طرح متاثر ہو سکیں اور اس شخصیت کی منفرد خصوصیات کو پہچان سکیں ۔